Mkutano wa wadau kuhusu utoaji wa maoni ya Dira ya Maendeleo ya mwaka 2050

Imetumwa lini: July 29th, 2024

Katibu Tawala Wilaya ya Simanjiro Bi.Warda A. Maulid aliyemwakilisha Mkuu wa Wilaya ya Simanjiro Mh. Fakii R. Lulandala alifungua na kuendesha mkutano wa wadau kuhusu utoaji wa maoni ya Dira ya Maendeleo ya Miaka 25 ijayo yani Dira ya maendeleo ya mwaka 2050 kilichofanyika katika ukumbi wa Halmashauri ya Wilaya ya Simanjiro tarehe 29.7.2024.Katika  Mkutano huo Kaimu Mkurugenzi wa Halmashauri ya Wilaya ya Simanjiro Dr. Swaleeh Masaza alitoa mwongozo wa Utoaji wa maoni kwa kuwaeleza washiriki kuanza kutoa maoni juu ya mafanikio na changamoto na utatuzi wa changamoto zilizojitokeza katika utekelezaji wa Dira ya Maendeleo ya Taifa ya mwaka 2025. Wajumbe walitoa maoni yaona kukubaliana kuwa Dira ya Maendeleo ya Taifa ya mwaka 2025 yani Dira ya 2000-2025 imekuwa na Mafanikio yafuatayo -;

Katika swala la Jamii iliyoelimika na kujifunza kuna mabadiliko makubwa.  Pamoja na Sera nzuri ya elimu, wajumbe walieleza kuwa ufundishaji wa wanafunzi mashuleni bado una changamoto kutokana na jamii kuhamasika na Sera ya elimu bila malipo na kupelekea upungufu wa walimu na miundombinu.

Aidha katika suala la Utawala na Uongozi bora mafanikio yaliyopatikana yalikuwa makubwa mno.

Pia lengo la Amani na utulivu limefanikiwa kwa asilimia kubwa kwani nchi yetu hadi sasa ina amani na utulivu tele.

Vilevile, Suala la Maisha Bora na Mazuri ni swala mtambuka kwasababu linalenga mtu mmoja mmoja, lakini kwa ujumla maisha yamebadilika na kuwa ni mazuri.

Uchumi Imara na wenye kuhimili Ushindani umefanikiwa kwa kiasi kidogo kwa kuwa hali za uchumi kwa jamii ya kifugaji bado haijaimarika.

Wadau wa Mandeleo pamoja na Wananchi walieleza Changamoto zilizojitokeza katika Utekelezaji wa Dira ya Maendeleo ya Taifa ya mwaka 2025 kama ifuatavyo: 

Mporomoko wa maadili katika jamii.

Kuwepo kwa migogoro mingi hasa migogoro ya ardhi

Uhaba wa miundombinu ya barabara, madarasa na mabweni

Usimamizi wa miradi ya maendeleo iliyoanzishwa katika jamii usioridhisha

Uhaba wa ajira hasa katika kada ya walimu (Upungufu wa Walimu shuleni)

Viongozi wachache kutokua na maadili katika usimamizi wa shughuli za Serikali.

Maeneo mengi ya miji kutopimwa. (Mfano: Orkesumet na Mirerani)

Wadau wa Mandeleo pamoja na Wananchi walieleza Utatuzi wa Changamoto zilizojitokeza katika Utekelezaji wa Dira ya Maendeleo ya Taifa ya mwaka 2025 kama ifuatavyo: 

Kuanzishwa kwa mabaraza ya wazee, Ziara ya viongozi zimendelea kufanyika mara kwa mara ili kubaini changamoto na vipaumbele vya wananchi katika maeneo yao, Taratibu za ugawaji wa ardhi zizingatiwe ili kuepuka uibukaji wa migogoro ambayo inarudisha maendeleo nyuma kwa mtu mmoja mmoja na jamii nzima kwa ujumla, Huduma muhimu zisogezwe kwa jamii, mfano umbali kati ya makazi na shule unasababisha changamoto ya kuwepo na wimbi la jamii isiyoweza kusoma na kuandika, Uanzishwaji wa viwanda vya usindikaji wa ngozi kutokana na rasilimali ya mifugo iliyopo katika wilaya ya Simanjiro ufanyike, Kuruhusu na kukaribisha wawekezaji kutoka nje, Kutenga maeneo ya kuweza kuanzisha huduma za kidini. Mfano uanzishwaji wa kanisa ambalo litaanzisha shule za chekechea na kulea jamii katika maadili mema, Jamii iruhusiwe kuanzisha upatikanaji wa huduma muhimu kama maji kwa kuruhusiwa kuchimba visima binafsi, Adhabu kali itolewe kwa wahusika watakaobainika katika kosa la kukatisha masomo ya wanafunzi kwa ajili ya mimba ili jamii iweze kujifunza, Jamii ihamasike na kuchangia gharama za kuwalipa walimu wa kujitolea ili kutatua changamoto ya uhaba wa walimu, Tafiti zifanyike na maandiko yaandaliwe na kuyawasilisha kwa wahusika na kuwakaribisha wawekezaji kutoka nje, Elimu ya ujasiriamali itolewe mashuleni ili kuijengea jamii uwezo wa kujitegemea.

Kadhalika katika dira ya maendleo ya mwaka  2025-2050 wadau na wananchi hao walipendekeza baadhi ya mambo yanayotakiwa kufanyika kama ifuatavyo-;

Kuwepo kwa mwendelezo wa utekelezaji wa Dira kwa kila awamu inayoingia madarakani, Elimu ya Ujasiriamali iwepo shuleni kuanzia shule ya msingi, Serikali isimamie utekelezaji wa sera za bei elekezi ya mazao ili kilinda maslahi ya wakilima.Mfumo wa elimu uendane na dhana ya kujiajiri ili kuwajengea wahitimu waweze kujiajiri, Vyama vya ushirika vifanyiwe maboresho ili kulinda maslahi ya mkulima na wafugaji,Ruzuku ya pembejeo itolewe kwa wakulima na wafugaji,Jamii ishirikishwe katika kutekeleza na kuchangia miradi ya maendeleo, Utamaduni uendelee kuzingatiwa,Jamii izingatie taratibu za uuzaji wa ardhi na uhamishaji wa umiliki ili kuepuka migogoro ndani ya jamii,

Pawepo na uwazi na haki katika swala zima la ajira, Mfumo mzuri wa kuhifadhi mazao ya wakulima kwa lengo la kuboresha uchumi wa wakulima na wafugaji na kuwa na uhakika wa chakula kwa Taifa uaandaliwe, Baraza la Wazee liboreshweKuangalia namba ya kuajiri  walimu wa dini katika kila shule ikiwa ni katika kudumisha maadili

Mwisho Kikao kilifugwa baada ya wadau kuwasilisha mapendekezo hayo, Mwenyekiti wa Halmashauri alipata nafasi ya kusema neno la mwisho katika kikao hicho na alisema kuwa anawasisitiza wananchi wanaoishi katika Halmashauri ya Wilaya ya Simanjiro kutumia fursa hii iliyotolewa na serikali kuchangia maoni yao juu ya kitu kinachopaswa kufanyika katika Dira ya Maendeleo ya miaka 25 inayokuja yani Dira ya Maendeleo ya mwaka 2050, Pia alitumia nafasi hiyo Kumpongeza Raisi wa Jamhuri ya Muungano wa Tanzania Dr.Samia Suluhu Hassan  kwa kufanikisha na kusimamia kwa asilima kubwa malengo yaliyowekwa katika Dira ya mwaka 2000-2025,

Kikao kilifugwa Rasmi kwa katibu Tawala wa Wilaya ya Simanjiro Bi.Warda Maulid kwa kuwashukuru na kuwapongeza wananchi na wadau wa maendeleo kwa kujitokeza kwa wingi kuhudhuria kikao hicho na kutoa maoni yao ya nini kifanyike katika Dira ya Maendeleo ya mwaka 2050 na alifunga kikao kwa kuwataka wananchi kutoa maoni yao kwa kutumia njia mbalimbali zilizopendekezwa na serikali ikiwemo kutumia mitandao ya kidigitali na  njia za simu kutoa maoni yao kuhusu dira hiyo.

Alihitimisha kwa kusema kuwa Mwananchi mmoja mmoja anaweza kutoa maoni kupitia:online portal ya https://dira2050portal.planning.go.tz/tume/dira Au

Kutoa maoni kupitia simu za mkononi USSD *152*00# aende Na. 8 - Elimu then Na. 4 – Dira 2050

#Kwa pamoja Tujenge Tanzania Tuitakayo.